Matthew 23

Yesu'a mono vaya'ai hosu kava'apie'mo hu'niya gemae

(Mak 12:38-39; Luk 11:43,46; 20:45-46)

1Ani afina'mo Yesu'a ali'a anupa hu'a mai'naya vaya'e ge'amo ne'afiya vaya'efe'mo hapa paino'ae'mo, 2ke'aepa gemo avo'mo kae'a ali'a apaya ne'malaya vaya'e Falasi vaya'mogi'e'mo Mosese aimu'yale'mo mai'ne'a ke'aepa gemo ali'a apaya ne'malaya'mofe'mo 3muki nehaya ge'apimo afite'a akame hiyo. Akame hiyo, hu'a nehaya'monanafa apakai'apimo akame nosaya'mofe'mo nehaya kava'apimo akame osiyo. 4Apakaemo kana ya'age'mo hayaete'a vaya'ai apaki'nale'mo ali'a kofi'a ne'apataya'monanafa apakai'apimo magoke apaya ako'yaleti'mo hapa mae'a ali'a asaga hu'a no'apatae. 5Apakaemo vaya'mogi apakesayafe'mo alu kava alu kava'mo nehae. Goti'a avo'mo kae male'niya gemo ali'a kesifi'mo malete'a hapanile'mo ne'malaya aise kesimo alopa kesifi'mo ne'malae. Kukena'apimo atupa'ale'mo konali ya'amo yatala yatala hu'a alo hu ne'malae. 6Alopa ne'ya'mo ne'nayategamo ala apaki vaya'mo ne'maiya yate'mo maisayafeke'mo nehae. Mono nokopi'mo anagamo hai'a maisayafeke'mo nehae. 7Maketi kumate'mo mai'naya vaya'mogimo ge apamamaete'a amuse hu'a ne'apataya kavafeke'mo nehapaiye. Ala tisa nene, Ala tisa nene, hu'a nehaya gee'mo nehapaiye. 8Nehapaiya'monanafa lapakaefe'mo, ala tisa nene, hu'a lapaki aesaya agufa kavatapimo ohane'niye. Ala tisa netapimo magoke vekatapimo mai'nigetapae'mo lapakaemo magoke aiyaya konaga vaya'mo mai'naya'mofe'mae. 9Afotapimo'mo magoke ne'mo mai'neno'ae'mo koku'napi'mo mai'niya'mofe'mo ma mopafi vaya'aife'mo, afotimogitapae, hutapa osiyo. 10Kava netapimo magoke vekamo Kalaisi'a mai'niya'mofe'mo lapakaefe'mo, kava vayatimogitapae, hu'a lapaki aesaya gemo ohane'niye. 11Lapakaepati'mo hogote vekamo'a ali'ya netapimo maino. Haiya vaya'mogi apaki'apile'mo ali'a asaga hu'nisafigeno apaki'apile'mo alino afepi'mo apategaiye. Haiya vaya'mogi apaki'apile'mo ali'a afepi apate'nisafigeno apaki'apile'mo alino asaga huno apategaiye.

Yesu'a ae'a ati nekaya vaya'aife'mo aiye aiye, huno hu'niya gemae

(Mak 12:40; Luk 11:39-52; 20:47)

13Ke'aepa gemo avo'mo kaetapa alita apaya ne'malaya vaya'mogitapa'e Falasi mono vaya'mogitapa'e'mo aetapa ati nekaya vayane, hu'na, vaehae, Lapakaetegamo aiye aiye avovo kava'mo afole aigiye. Goti'a yagaino ne'apateya kote kipate'mo he ti'a mai'naya vaya'ai apaulagale'mo kitamo kitapa ne'apatae. Lapakaitapimo utapa nohaifa u'a haisayafe'mo nehaya vaya'ai ka'mo akanitapa ne'apatae. 14Ke'aepa gemo avo'mo kaetapa alita apaya ne'malaya vaya'mogitapa'e Falasi mono vaya'mogitapa'e'mo aetapa ati nekaya vayane, hu'na, vaehae, Lapakaetegamo aiye aiye avovo kava'mo afole aigiye. Lapakaemo kogu a'ne'aife'mo humi apatetetapa kagemi ya'apimo alitetapa vaya'mogi lapakesayafe'mo yatala yatala nunumu'mo nehae. Mago'e huno kayo'mo lapamigiye.

15Ke'aepa gemo avo'mo kaeta alita apaya ne'malaya vaya'mogitapa'e Falasi mono vaya'mogitapa'e'mo aetapa ati nekaya vayane, hu'na, vaehae, Lapakaetegamo aiye aiye avovo kava'mo afole aigiye. Magoke vekamo'a getapimo afiteno lapakame hisiyafe'mo solovala ani'mo lakaege muki mopafi'mo umenitata huge hutapa ne'maiye. He afa'a afiguve huno hisiya'mo'mo alitapa aya maletetapa hosu kavatefe'mo aeno lapaka seno ata kopi'mo lamino maisiya vekamo alitapa hamaletapa ne'atae.

16Lapaulagamo ali hu'nigetapa ka'mo alitapa ho hulitapa ne'vaya vayane, hu'na, Lapakaetegamo aiye aiye avovo kava'mo afole aigiye. Lapakaemo hutapae'mo, Mago vekamo'a, aote alopa mono nopati'mo alagi lama gemo nehuve, huno nehisiyana ani gemo osuno afa'a atalesiya gemo hane'niya'monanafa aote alopa mono nopi'mo goli yafateti'mo alagi lama gemo nehuve, huno nehisiyana ani gemo o'ataleno afa'age'mo hugiye, hutapa nehae. 17Lapaulagamo ali hu'nigetapa negi nagi nehaya vayane, hu'na, Na agufa ya'mo'a aeno aga seno hogote ya'mo hane'niye. Mono nopi'mo hane'niya goli yafa'mo'a aote alopa mono no'mo aeno agase'nifi aote hu male'niya mono no'mo'a aeno agase'niye. 18Mago'e gemo hutapae'mo, mago vekamo'a, ofalinimo ne'malaya hi'yalamuteti'mo alagi lama gemo nehuve, huno nehisiyana ani gemo osuno afa'a atalegaiya'monanafa hi'yalamute'mo hane'niya ofalinileti'mo alagi lama gemo nehuve, huno nehisiyana ani gemo afa'a amagino o'atalegaiye, hutapa nehae. 19Lapaulagamo ali hu'niya vayane, hu'na, Na agufa ya'mo'a aeno aga seno hogote ya'mo hane'niye. Ofalinimo'a aeno agase'nifi hi'yalamu'mo'a ofalinimo aote hu male'niya hi'yalamu'mo aeno agase'niye. 20Ani kavatefe'mo hi'yalamuteti'mo alagi lama gemo nehuve, huno nehisiya vekamo'a ani kava huno hi'yalamuteti'e muki hi'yalamute'mo hane'niya yateti'e'mo alagi lama gemo nehuve, huno nehiye. 21Aote alopa mono nopati'mo alagi lama gemo nehuve, huno nehisiya vekamo'a ani kava huno mono nopati'e aote mono nopi'mo ne'maiya netegati'e'mo alagi lama gemo nehuve, huno nehiye. 22Koku'nategati'mo alagi lama gemo nehuve, huno nehisiya vekamo'a ani kava huno Goti'a yagaino ne'apateya siateti'e sia'ale'mo fai mai'niya vekaleti'e'mo alagi lama gemo nehuve, huno nehiye.

23Ke'aepa gemo avo'mo kaetapa alita apaya ne'malaya vayanagi Falasi mono vayanagi hutapa aetapa ati nekaya vayane, hu'na, vaehae, lapakaetegamo aiye aiye avovo kava'mo afole aigiye. Lapakaemo ke'aepa gemo akame hisayafe'mo hoyafati ne'ya'mo alinitetapa ne'malaya yapati'mo teni hu'niya ya'mo alita fako hutapa magoke ya'mo Goti'mo ne'amiya'monanafa hogote ke'aepa gemo aeno aga se'niya ke'aepa ge'amo akame hisayafe'mo vaya'aitegamo fatago kava'mo osuge lapau hutapa o'apatege lama ge kava'mo osuge hu'nae. Ani kava'mo nehutapae'mo mago alu ke'aepa ge'e'mo o'ataleyo. 24Lapaulagamo ali hu'nigetapa ka'mo alitapa ho hulitapa ne'vaya vayane, hu'na, lapakaemo anipati'mo kamegagu'mo alitapa kalo paetapa ne'atalaya'monanafa kamo afugefamo asagautapa ne'nakaiye.

25Ke'aepa gemo avo'mo kaetapa alita apaya ne'malaya vayanagi Falasi mono vayanagi hutapa aetapa ati nekaya vayane, hu'na, vaehae, lapakaetegamo aiye aiye avovo kava'mo afole aigiye. Kaputapimo agotofu'alega'e yuvapatapimo agotofu'alega'e'mo sese nehaya'monanafa agu'afilagamo kumaya ne'aliya kavatapi'e lapa'ye nehiya kavatapi'e'mo hane'niye. 26Lapaulagamo ali hu'niya Falasi mono vaya'mogitapae, hu'na, hogotetapa kaputapimo agu'afilaga'e yuvapatapimo agu'afilaga'e'mo sese higeno'ao agotofu'alega'e'mo alagepa huno haneno. 27Ke'aepa gemo avo'mo kaetapa alita apaya ne'malaya vayanagi Falasi mono vayanagi hutapa aetapa ati nekaya vayane, hu'na, vaehae, lapakaetegamo aiye aiye avovo kava'mo afole aigiye. Lapakaemo fali'naya vaya'mo ki'a apatete'apae'mo yaveyave aniteti'mo note'mo fale'a ati nekaya nokana hutapa mai'nae. Ani agufa no'mo agotofu'alega kanale ya'age'mo hane'niya'monanafa no'agu'afilagamo fali'naya vaya'ai apayamufamo hanege kasali'nigeno atu ne'aiya ya'mo hanege huno havaiteno hane'niye. 28Ani kava hu'a vaya'mogimo amega lapakufa'ale'mo lapakete'apae'mo alagepa vaya'mo mai'nae, hu'a nelapakaya'monanafa lapaipafi'mo aetapa ati nekaya kava'e Goti ke'aepa ge'amo amagitapa ne'atalaya kava'e'mo havaiteno hane'niye.

29Ke'aepa gemo avo'mo kaetapa alita apaya ne'malaya vayanagi Falasi mono vayanagi hutapa aetapa ati nekaya vayane, hu'na, vaehae, lapakaetegamo aiye aiye avovo kava'mo afole aigiye. Lapakaemo Gotitegati gemo alini e'a ae'a hakalo hu'a hapa pai'naya vaya'mo apamagi'nage'a fali'naya vaya'mo ki'a apate'naya yate'mo no'mo kitapa apatege fatago vaya'ai kanolule'mo konali alitapa apatege nehae. 30Lapakaemo, laginago vaya'mo mai'naya afina'mo mai'nonesinana apakae'e'mo magokepi Gotitegati gemo alini e'a ae'a hakalo hu'a hapa nepaiya vaya'mo o'apamagi'nonesine, hutapa nehae. 31Ani gemo hutetapae'mo Gotitegati gemo alini e'a ae'a hakalo hu'a hapa pai'naya vaya'mo kamiti apamagi'naya vaya'ai apakinago'apimo lagaemo mai'none, hutapa lapakaitapie'mo mani agufa faigoko gemo nehae. 32Lapakinago vaya'mogi ani hosu kava'mo ali'a aepa fai'nayanagi kanalenagi ani agufa hosu kava'mo hulitutapa hutapa hano hiyo.

33Nagalo'yave vayanagi nagalo'yave afamo anaga vayane, hu'na, Goti'a agoti huno lapateteno'ae'mo, hosu vaya'mo mai'nae, huno hisigetapa ata kopi'mo lamigae. Haiya kava hutapa aeta kasalo paegae. 34Ani kavatefe'mo nagaemo Gotitegati gemo alini e'a ae'a hakalo hu'a hapa nepaiya vayanagi afite'a age'naya vayanagi ali'a apaya ne'malaya vayanagi hu'na ali'na apatesuge'a lapakaetegamo ugae. Lapakaemo mago vaya'mo apamagige mago vaya'mo malipu yosale'mo nili aitetapa alita he titapa apatege mago vaya'mo mono notapifi'mo nofi kayoteti'mo apamagige mago vaya'mo taoni'afi taoni'afi'mo vegala aege hugae. 35Ani kava hugaya'mofe'mo muki vaya'mo hapae'naya kavateti'mo vai'mo lapamigiye. Fatago vekamo Evo'mo haege hosu kava'mo osu'naya vaya'mo hapaeme hapaeme ege Melekaiya mafa'ne'amo Sekalaiya'mo alopa mono no'e ofalini ne'malaya hi'yalamu'e'mo hane'na'a folagapi'mo kamiti amagige hu'nae. 36Lama ge lapa nepauve, huno, ani hapae'naya kavatefe'mo muki hemenimo afa'a mai'naya vaya'mo kayo'mo lapamigiye, huno hapa pai'niye.

Yulusalemu taonifi'mo mai'naya vaya'aife'mo hau huno apate'niya gemae

(Luk 13:34-35; 19:41-44)

37Yulusalemu taoniyo, Yulusalemu taoniyo, hu'na, Goti'a agaetegati gemo alini e'a ae'a hakalo hu'a hapa nepaiya vaya'mo alino apate'nige'a ne'agekae'mo kamiti apamagige apa vaya'mo yafa kayoteti'mo apamagige nehane. Kokolemogimo apana'aumo apavaleli'e'a hapakufi'mo apati kae'a ne'maiya kava hu'na muki afina'ae afina'ae'mo mafa'nekamo apavaleli'ne'na hapau vaisuvafe'mo nahau'niya'monanafa okahau'niye. 38Afiyo, hu'na, ani afinateti'mo kotapimo no atufa'age'mo hanegaiye. 39Ani afinateti'mo o'nagetapa maime maime ne'utapae'mo,Ala kava ne'mo agi'alefe'mo ne'eya vekamo ha maeno, hutapa nehisage'nae'mo egauve, huno hu'niye.